៦ប្រការដើម្បីស្នេហាគង់វង្ស
ប្រភព៖ CléO Mag.
ដោយ៖ LOVE GURU
… សំរាប់អ្នកមានស្នេហ៍ក្នុងបេះដូង ហើយចង់រក្សាស្នេហ៍ឲ្យបានគង់វង្ស…
1- សភាវគតិ និងខួរក្បាល
នៅពេលដែលស្នេហាកើតមានឡើងក្នុងខ្លួនអ្នក វាកើតឡើងព្រោះបេះដូងប្រើខួរក្បាល ឲ្យបញ្ចេញសារធាតុម្យ៉ាងទៅក្នុងខ្លួនរបស់អ្នក ឲ្យច្របូកច្របល់ជ្រួលច្រាលនៅពេលជួបជាលើកទីមួយ នេះគេហៅថាសភាវគតិ។ ស្នេហ៍អាចឈានដល់ចំណុចណាមួយទៅបាន ព្រោះខួរក្បាលរបស់អ្នកមានតួនាទីក្នុងការសម្រេចអនុញ្ញាត ទោះស្នេហាឈានដល់ផ្លួវនៃហេតុផល អារម្មណ៍ ក៏មិនអាចបំបែកសភាវគតិ និងខួរក្បាលរបស់អ្នកពីគ្នាបានឡើយ។ ដូច្នេះអ្នកត្រូវប្រើខួរក្បាលត្រិរិះពិចារណាតាមសេចក្តីត្រូវការរបស់បេះដូងអ្នក មិនមែនប្រើអារម្មណ៍ ឬស្តាប់តាមពាក្យអ្នកដ៏ទៃទេ។
2- ទ្រឹស្តីសាសនា
ត្រូវយកទ្រឹស្តីរបស់សាសនារបស់អ្នកជាគោលសំរាប់សេចក្តីស្នេហា។ ឧទាហរណ៍៖ សំរាប់ព្រះពុទ្ធសាសនា ព្រហ្មវិហ៊ារធ៌ម នៃស្នេហាមាន៖
- មេត្តា គឺ ស្នេហាដែលមិនសង្ឃឹមផលតបស្នង មានតែក្តីប្រណី និងការឲ្យនិងឲ្យ នៅពេកម្នាក់ៗចេះផ្តល់ឲ្យគ្នាទៅវិញទៅមកស្នេហ៍អ្នកនឹងមិនមានពាក្យថាអត្មានិយម។
– ករុណា មានចិត្តអាណិត យល់ចិត្តយល់ថ្លើម និងជួយទុកធុរៈមនុស្សដែលអ្នកស្រឡាញ់។
- មុតិតា មានក្តីសប្បាយរីករាយនៅពេលដែលឃើញមនុស្សដែលអ្នកស្រឡាញ់មានក្តីសុខ។
- ឧបេខា គឺជឿជាក់ថាគ្មានអ្នកណាម្នាក់ឥតខ្ចោះ សូម្បីតែខ្លួនអ្នកផ្ទាល់ ដូច្នេះការបណ្តោយ ឬមើលរំលងចំនុចខុសឆ្គងខ្លះៗ អាចធ្វើឲ្យមនុស្សដែលអ្នកស្រឡាញ់ក្លាយជាឥតខ្ចោះក្នុងក្រសែភ្នែករបស់អ្នក។
3- គំរួស្នេហ៍
អ្នកមិនអាចគូសប្លង់ដើម្បីសាងសង់ស្នេហាបានទេ តែអ្នកអាចជ្រើសយកគំរូសំរាប់ស្នេហ៍របស់អ្នកបាន។ រកវីរៈបុរស ឬវីរៈនារីក្នុងចិត្តរបស់អ្នក ដូចជាគំរូស្នេហារបស់មនុស្សក្នុងក្រុមគ្រួសារ គ្រូបាអាចារ្យ ឬបុគ្គលសំខាន់ក្នុងលោកមកធ្វើជាគំរូបាន ដើរតាមដាននៃភាពស្នោះត្រង់ ជឿជាក់ និងពិតប្រាកដសំរាប់ផ្លូវស្នេហ៍ដែលអ្នកកំពុងធ្វើទៅមុខ ពុះពារតាំងចិត្ត និងមិនរាថយ នោះស្នេហារបស់អ្នកនឹងទៅដល់ត្រើយសុភមង្គលមិនខាន។
4- ចិត្តយើង និង ចិត្តគេ
សេចក្តីត្រូវការរបស់អ្នកពាក់កណ្តាល និងរបស់គូរស្នេហ៍អ្នកពាក់កណ្តាល ឬម្នាក់កន្លះរង្វង់នៅពេលផ្គុំចូលគ្នានឹងបានជារង្វង់មូលមួយពេញលក្ខណៈ ដែលព្រមសំរាប់វិលទៅមុខជានិច្ច គ្រាន់តែអ្នកទាំងពីរចាប់ដៃគ្នាផ្គុំកង់រង្វង់នោះឲ្យជាប់ប៉ុណ្ណោះ អ្នកនឹងអាចឆ្លងកាត់ឧបសគ្គទាំងឡាយបាន។ បើអ្នកយកតែចិត្តខ្លួនឯងជាធំ ហើយគេយកតែចិត្តគេ ម្នាក់ៗគិតតែពីខ្លួនឯង នោះអ្នកទាំងពីរមិនអាចជួយគ្នាធ្វើឲ្យកង់រង្វង់ស្នេហ៍អ្នកបរទៅមុខបានទេ គឺរង់ចាំតែពេលបែកបាក់ពីគ្នាប៉ុណ្ណោះ។
5- សៀវភៅ
ការអានសៀវភៅបើកភ្នែករបស់អ្នកឲ្យកាន់តែភ្លឺ ស្នេហាអាចធ្វើឲ្យអ្នកឈឺចាប់ និងព្យាយាមរើបំរាស់ នេះជាគុណវិបត្តិរបស់ស្នេហ៍ ដែលវាធ្វើឲ្យអ្នកនឿយហត់ បើអ្នកត្រូវរត់តាមរកចម្លើយដែលកប់ជ្រៅក្នុងក្តីស្នេហ៍របស់អ្នក។ បើហត់ត្រូវសំរាកខ្លះ អង្គុយស្ងៀមស្ងាត់ បើកចិត្តស្នេហ៍របស់អ្នកឲ្យទូលាយដោយការអាន ដូចជាការធ្វើសមាធិ កែលំអរឲ្យល្អ និងយល់ពីចិត្តខ្លួនឯងជាមុនសិន សឹមទៅយល់ពីចិត្តមនុស្សដែលអ្នកស្រឡាញ់។ រឿងរ៉ាវស្នេហារបស់អ្នកដទៃ ជាមេរៀនដ៏មានតម្លៃដែលអាចបំភ្លឺផ្លូវអ្នកឲ្យកាន់តែច្បាស់។ ជីវិតរបស់មនុស្សមិនដូចគ្នាទេ ថ្ងៃនេះសើចព្រោះស្នេហ៍ តែថ្ងៃខាងមុខក៏អាចយំព្រោះស្នេហ៍ ថ្ងៃនេះអ្នកកើតទុកព្រោះស្នេហ៍តែក៏នៅមានមនុស្សដែលមានទុកជាងអ្នកទៀត អ្នកគ្រាន់តែយល់ពីស្នេហ៍ឲ្យកាន់តែច្រើនអ្នកនឹងមិនចាំបាច់បញ្ចេញកំលាំងរត់តាមរកវា។
6- តន្ត្រី
តន្ត្រីលួងលោមចិត្តមនុស្សអស់រយៈពេលយូរលង់ណាស់មកហើយ សំលេងតន្ត្រីព្យាបាលស្នេហ៍ និងអាចតភ្ជាប់បេះដូងមនុស្សជាច្រើននាក់ក្នុងលោកនេះ។ មុននឹងបានមកជាចម្រៀងមួយបទ អ្នកនិពន្ធត្រូវបានតាក់តែងចេញពីបេះដូង ដែលស្រង់ចេញពីបទពិសោធក្នុងជីវិត មកចងក្រងជាពាក្យពេចន៍ ឲ្យស៊ីនិងភ្លេង (ក្នុងករណីចម្រៀងស្នេហាប៉ុណ្ណោះ) មកបំពេរអារម្មណ៍អ្នកស្តាប់។ បទចម្រៀងមានន័យ ប្រដូចនឹងស្នេហ៍របស់អ្នក ពេលខ្លះអត្ថន័យស្នេហាដែលអ្នកចង់ដឹង អាចមានឆ្លើយក្នុងបទចម្រៀងណាមួយ។
