ស្វែងយល់ពីការថែសុខភាពស្ត្រីស្រឡាញ់ភេទដូចគ្នា
ប្រភព៖ ឯកសារបរទេស
ប្រែសំរួលដោយ៖ Kv
ស្ត្រីស្រឡាញ់ភេទដូចគ្នា ឬ ហៅម្យ៉ាងទៀតថា ឡេសបៀន ត្រូវបានគេប៉ាន់ប្រមាណថាមានចំនួនច្រើនជាងបុរសស្រឡាញ់ភេទដូចគ្នារហូតដល់ទៅពាក់កណ្ដាល តែស្ត្រីដែលស្រឡាញ់ភេទដូចគ្នាពិតៗ(មានភេទសម្ព៏ន្ធតែជាមួយស្ត្រីដូចគ្នា) នោះមានចំនួនតិចជាង ការសិក្សាស្រាវជ្រាវពី J Reprod Med 1987 បង្ហាញថា ស្ត្រីដែលស្រឡាញ់ស្ត្រី ក៏បានបុរសក៏បាន មានចំនួនរហូតដល់ទៅ ៧៧% នៃចំនួនស្ត្រីស្រឡាញ់ភេទដូចគ្នា។ ការមើលថែរសុខភាពរបស់ស្ត្រីស្រឡាញ់ភេទដូចគ្នា មិនសូវមានលក្ខណៈខុសគ្នាពីស្ត្រីដែលមានសម្ព័ន្ធភាពជាមួយបុរស ផងជាមួយស្ត្រីផងទេ។
ក្នុងករណីស្ត្រីដែលស្រឡាញ់ភេទដូចគ្នាហើយមានទំនាក់ទំនងផងដែរជាមួយបុរស ការមើលថែរសុខភាព មានដូចជា៖ ត្រួតពិនិត្យរកមើលជំងឺមហារីកមាត់ស្បូន ត្រូវធ្វើការត្រួតពិនិត្យដូចស្ត្រីទូទៅ នៅពេលនាងមានអាយុ ២១ឆ្នាំ ឬពិនិត្យក្រោយពេលមានការរួមរ័កមិនយឺតជាង ៣ឆ្នាំ និងធ្វើឡើងរាល់ឆ្នាំ។ ពិនិត្យរកជំងឺកាមរោគទូទៅផងដែរ គួរប្រញាប់ទៅពិនិត្យក្រោយពេលមានធ្លាក់ ស ខុសធម្មតា ឬមិនទុកចិត្តខ្លួនឯង (រួមភេទមិនមានសុវត្ថិភាព) ជាពិសេសមិនគួររំលងការពិនិត្យឈាមរកមេរោគអេដស៍។
ក្នុងករណីស្ត្រីស្រឡាញ់ភេទដូចគ្នាដែលមិនមានទំនាក់ទំនងជាមួយបុរស ឱកាសកើតជំងឺមហារីកមាត់ស្បូនមានតិចណាស់ ព្រោះអ្នកជំនាញវេជ្ជសាស្ត្របានរកឃើញថា ជំងឺមហារីកមាត់ស្បូនភាគច្រើនមានមូលហេតុចម្បងមកពីការឆ្លងវីរុស FPV ប្រភេទបង្កជាមហារីកមាត់ស្បូន វីរុសប្រភេទនេះធ្វើឲ្យកោសិការមាត់ស្បូនប្រែប្រួលខុសធម្មតា ក្លាយទៅជាកោសិការមហារីក ( វីរុស FPV មាន ៣៥ប្រភេទដែលបង្កជាមហារីក តែ ៧០ ទៅ ៨០% នៃវីរុសប្រភេទនេះមិនបណ្តាលឲ្យកើតមហារីកទេ) វីរុសប្រភេទនេះតែងឆ្លងតាមរយៈការរួមភេទរវាងបុរស និងស្ត្រី។
ទោះជាស្ត្រីស្រឡាញ់ភេទដូចគ្នាមិនចាំបាច់ធ្វើការពន្យាកំណើតក៏ដោយ តែការដែលមិនមានកូន និងការដែលមិនបានទទួលអ័រមូនពីថ្នាំពន្យាកំណើត ធ្វើឲ្យពូកគេមានឱកាសកើតមហារីក អូវែ, មហារីកភ្នាស់ស្បូន, ដុំសាច់ដុះក្នុងស្បូន (Myoma Uteri) និងជំងឺភ្នាស់ស្បូនលូតលាស់ខុសទីកន្លែង។ ដូច្នេះស្ត្រីក្រុមខាងលើគួរធ្វើការពិនិត្យរកជំងឺមហារីកដូចស្ត្រីធម្មតាដែលមានទំនាក់ទំនងភេទជាមួយបុរសដែរ។
សំរាប់ជំងឺកាមរោគ ទោះបីស្ត្រីស្រឡាញ់ភេទដូចគ្នាមានបញ្ហាតិចជាងស្ត្រីធម្មតាក៏ដោយ តែមិនមែនមានន័យថាមិនមានឆ្លងនោះទេ ព្រោះស្ត្រីដែលស្រឡាញ់ភេទដូចគ្នាភាគច្រើន មានលក្ខណៈមិនខុសអ្វីពីបុរសដែលស្រឡាញ់ភេទដូចគ្នាទេ គេមានដៃគូរួមភេទច្រើន មានឱកាសជួបស្ត្រីដែលមានទំនាក់ទំនងភេទជាមួយបុរសដែលមានឆ្លងជំងឺ ដែលនេះជាបញ្ហាដែលពួកគេត្រូវប្រឈមមុខនឹងការឆ្លងជំងឺកាមរោគបាន។
បច្ច័យខាងលើធ្វើឲ្យឱកាសឆ្លងជំងឺកាមរោគស្ទើរគ្រប់ប្រភេទ ពីស្ត្រីទៅស្ត្រីបាន តាមរយៈការប៉ះពាល់ផ្ទាល់អវៈយវៈភេទដូចជា៖ រោគស្វាយ ប្រមេះទឹកបាយ សិរមាន់ ធ្លាក់ស ដំបៅទ្វាមាស ផ្សិត និងជាពិសេសជំងឺ AIDS។ ដូច្នេះស្ត្រីគ្រប់រូបត្រូវធ្វើការត្រួតពិនិត្យរកមេរោគកាមរោគ និងមហារីប្រដាប់បន្តពូជជាប្រចាំ មិនថាអ្នកមានឬគ្មានទំនាក់ទំនងជាមួយបុរសក៏ដោយ។
ប្រការសំខាន់មួយទៀតគឺ នៅពេលទៅរកពេទ្យគួរប្រាប់ត្រង់ថាខ្លួនជាស្ត្រីស្រឡាញ់ភេទដូចគ្នាឬទេ? តាមស្ទង់មតិរបស់ប្រទេស កាណាដា រកឃើញថា ១៥% នៃឡេសបៀន មិនទៅរកពេទ្យទេ ព្រោះពួកគេគិតថាបើគ្រូពេទ្យដឹង គ្រូពេទ្យនឹងមានអគតិចំពោះនាង ហើយមួយភាគធំជាលាក់បាំងពេទ្យមិនឲ្យដឹង។ ទាំងនេះជាការយល់ខុសទាំងស្រុង ព្រោះការលាក់បាំងគ្រូពេទ្យជាទង្វើដែលមិនត្រឹមត្រូវ គ្រូពេទ្យអាចជួយអ្នកជំងឺរឹកតែច្រើននៅពេលដែលដឹងច្បាស់ពីស្ថានភាពពិតរបស់អ្នកជំងឺ ម្យ៉ាងទៀតពេទ្យនឹងអាចផ្តល់ដំបូន្មានយ៉ាងត្រឹមត្រូវដល់អ្នក ទាំងផ្នែកសុខភាពកាយ សុខភាពចិត្ត។
