អ័រមូនប្រែប្រួលជាមូលហេតុនៃស្នេហ៍បែកបាក់
បញ្ហាការលែងលះរបស់គូស្វាមីភរិយាបច្ចុប្បន្នមានការកើនឡើងកាន់តែខ្ពស់ឡើង ដែលមូលហេតុនៃការលែងលះភាគច្រើនបណ្តាលមកពីភាពមិនចុះសំរុងគ្នា។ តើលោកអ្នកមានជ្រាបទេថាមួយក្នុងចំណោមមូលហេតុសំខាន់របស់ភាពមិនចុះសំរុងគ្នាទាំងនោះ កើតឡើងពីបញ្ហាខាងក្នុងរបស់សុខភាពដែលមិនសូវមានអ្នកនឹកដល់វា នោះគឺ ការប្រែប្រួលរបស់កម្រិតអ័រមូនក្នុងរាងកាយ ជាពិសេសក្នុងរាងកាយរបស់ស្ត្រី មានដូចជា ចិត្តច្រើនឆាប់ខឹង ខ្វាយខ្វល់ មួរម៉ៅ ប៉ិនរអ៊ូរទាំ ដែលទាំងនេះជាដើមហេតុនៃការឈ្លោះប្រកែកគ្នា រហូតដល់ថ្នាក់ចែកផ្លូវគ្នាដើរតែម្តង។
នេះវាមិនមែនជារឿងតូចតាចទេ!
គ្រូពេទ្យជំនាញរបស់ស្ថាប័នគ្រួសារគងវង់ "Candle in The Wind" បានបង្ហាញពីអាការៈដែលបណ្តាលមកពីការប្រែប្រួលអ័រមូនថា៖ ក្នុងពេលជិតមានការធ្លាក់ឈាមរដូវ ស្ត្រីមួយចំនួននឹងមានការអារម្មណ៍ប្រែប្រួល ដោយមិនដឹងពីមូលហេតុ អ្នកខ្លះឆាប់មួរម៉ៅ ចុកពោះ តឹងពោះ ហើមដៃ ឬជើង អារម្មណ៍ផ្លូវភេទមានការប្រែប្រួល។ បើសិនស្វាមីភរិយាមិនបានដឹងពីបញ្ហានេះទេ ពួកគេនឹងប្រឈមមុខនឹងការឈ្លោះប្រកែកគ្នា ព្រោះបុរសខ្លះក៏មិនយល់ពីអារម្មណ៍របស់ស្ត្រី ក្នុងពេលជិតមក និងពេលកំពុងមានធ្លាក់ឈាមរដូវ។ ក្រៅពីនេះការប្រែប្រួលរបស់អ័រមូលដែលជាដើមចមបញ្ហារបស់ជីវិតគូ នៅអាចបណ្តាលឲ្យផ្លូវចិត្តរបស់ស្ត្រីមួយចំនួនកើតជារោគ សោកសៅ ស្ត្រីដែលកើតរោគនេះអាចឈានដល់ការធ្វើអត្តឃាត គិតថាខ្លួនឯងគ្មានតំលៃ និងមិនចង់មានជីវិតនៅលើលោកនេះទៀតឡើយ បើនៅខណៈពេលនោះបុរសដែលជាស្វាមីបានធ្វើឲ្យនាងមានការឃ្មើសចិត្តបន្តិចថែមទៀតនោះ ហាក់ដូចជាគេជំរុញនាងធ្វើអ្វីដោយមិនដឹងខ្លួន។
ពេទ្យជំនាញផ្នែកអ័រមូនបានរៀបរាប់បន្ថែមពីអាការរោគ សោកសៅ ថា៖ អាការៈបែបនេះកើតមានយូរណាស់មកហើយ ជាពិសេសកើតលើស្ត្រីក្នុងវ័យ ២៥ឆ្នាំឡើងទៅ ហើយច្រើនកើតឡើងមុនពេលមានការធ្លាក់ឈាមរដូវ។ ភាគច្រើនសង្កេតឃើងនាងឆាប់ ឆេវឆាវ មួរម៉ៅ និងស្ងៀមស្ងាត់ សោកសៅ កណ្តោចកណ្តែង អ្នកខ្លះសោកសៅរហូតគិតមិនចង់មានជីវិតរស់ ធ្វើការមិនបាន មានជីវិតរបស់នៅលើលោកក៏គ្មានន័យ ស្វាមីមិនយកចិត្តទុកដាក់ ។ល។ ដែលទាំងនេះសុទ្ធសឹងកើតពីការប្រែប្រួលអ័រមូនក្នុងរាងកាយ។
វិធីដោះស្រាយដំណាក់ការមូលដ្ឋាន គឺស្វាមីត្រូវស្វែងយល់ពីភរិយាឲ្យបានច្រើន គួរដឹងថាពេលណានាងជិតមករដូវ ហើយទាំងគូត្រូវព្យាយាមសង្កត់ចិត្ត អត់ធ្មត់ចាំដល់ពេលចិត្តស្ងប់បន្តិចសឹមនិយាយគ្នា ដោះស្រាយបញ្ហារបៀបមនុស្សស្រឡាញ់គ្នា គួរចៀសវាងការប្រើពាក្យសម្តីឌឺដង របៀបបញ្ជួសបន្សោក ដុតរោលឲ្យរិតតែក្តៅ ។ បញ្ហាខាងលើនេះអាចដោះស្រាយបានបើសិនអ្នកក្បែរកាយស្ត្រីយល់ច្បាស់ពីស្ថានភាពការប្រែប្រួលក្នុងរាងកាយរបស់នាង។ តែបើសភាពផ្លូវចិត្តនាងកាន់តែពិបាកគ្រប់គ្រងនោះសូមណែនាំថា អ្នកទាំងពីរគួរដឹកដៃគ្នាទៅជួបគ្រូពេទ្យផ្នែកចិត្តសាស្ត្រទើបជាការប្រសើរ ។
