វីតាមីនដេជួយឱ្យគេចផុតពីជំងឺមហារីកក្រពេញពងស្វាស
បុរសនៅពេលដែលបានទទួល វីតាមីន ដេ ពីពន្លឺថ្ងៃ គឺជួយកាត់បន្ថយគ្រោះថ្នាក់ពីការកើតជំងឺមហារីកក្រពេញពងស្វាស។ ការសិក្សាស្រាវជ្រាវបានធ្វើទៅលើក្រុមបុរសគំរូពីមហាវិទ្យាល័យហាវើត និងមន្ទីរពេទ្យស្ត្រី ប៊្រីកហេម ដោយអ្នកស្រាវជ្រាវបានយកគំរូឈាមរបស់បុរសចំនួន១.០៨២នាក់ដែលកើតមហារីកក្រពេញពងស្វាសក្នុងរយៈពេល១៥ឆ្នាំក្រោយមកទៀត ដោយការវាស់ធាតុផ្សំនៅក្នុងវីតាមីន ដេ ២ប្រភេទដែលជួបនៅក្នុងឈាមមកប្រៀបធៀបជាមួយបុរសចំនួន១.៧០១នាក់ដែលមិនកើតមហារីក។
លទ្ធផលបានបង្ហាញថា បុរសដែលមានកំរិតសារធាតុផ្សំវីតាមីន ដេ ខ្ពស់ គឺមានឱកាសគ្រោះថ្នាក់នៃការកើតមហារីកក្រពេញពងស្វាសតិចជាងអ្នកដែលមានវីតាមីន ដេ ទាប។
លទ្ធផលស្រាវជ្រាវខាងលើកាន់តែគួរឱ្យទុកចិត្តថែមទៀត នៅពេលដែលអ្នកស្រាវជ្រាវយកគំរូឈាមពីបុរសដែលចូលរួមនៅក្នុងការងារស្រាវជ្រាវមកពិនិត្យរកមើលជាតិកាល់ស្យូម និងវីតាមីន ដេ។
ទោះជាយ៉ាងណាក៏ដោយ ក៏គ្រូពេទ្យភាគច្រើននៅមិនហ៊ានផ្តល់យោបល់ថា ពន្លឺថ្ងៃផ្តល់នូវវីតាមីន ដេ បានពិតប្ញយ៉ាងណាទេ គឺត្រូវរង់ចាំឱ្យមានការសិក្សាស្រាវជ្រាវលំអិតជាងនេះទៀត ប៉ុន្តែក៏ទទួលស្គាល់ថា បើសិនជាបានហាលថ្ងៃក្នុងមួយថ្ងៃប្រហែល១៥នាទីនោះនឹងជួយឱ្យរាងកាយបានទទួលវីតាមីន ដេ គ្រប់គ្រាន់។ តែបើសិនជាទទួលពន្លឺថ្ងៃច្រើនហួសហេតុពេកក៏អាចធ្វើឱ្យកើតជំងឺមហារីកស្បែកបានដែរ។
ក្រៅពីនេះ នៅមានរបាយការណ៍ស្រាវជ្រាវផ្សេងទៀតក៏បានបង្ហាញថា ការពិសាទឹកដោះគោនឹងជួយបន្ថែមវីតាមីន ដេ ឱ្យរាងកាយបាន ប៉ុន្តែបើពិសាច្រើនក៏ធ្វើឱ្យប្រឈមនឹងការកើតមហារីកក្រពេញពងស្វាសបានដែរ។ គួរបញ្ជាក់ថា ការដែលមនុស្សយើងទទួលបាននូវសារធាតុវីតាមីនច្រើនក៏អាចជួយឱ្យរាងកាយធំធាត់ និងមាំមួនល្អផងដែរ នេះបើតាមរបាយការណ៍នៃការសិក្សាស្រាវជ្រាវនាពេលកន្លងមក។
(ដកស្រងពីកាសែតកោះសន្តិភាព)
