ការរួមភេទរបៀបនេះក៏មិនអាចការពារស្ត្រីពីការឆ្លងមេរោគអេដស៍បានដែរ ពីព្រោះទឹកកាមរបស់បុរសនៅតែចូលទៅក្នុងទ្វារមាសបាន ។ ប្រសិនបើទឹកកាមបុរសនោះមានមេរោគអេដស៍ ពេលវាចូលដល់ក្នុងទ្វារមាសហើយ មេរោគអាចជ្រាបចូលទៅក្នុងប្រព័ន្ធឈាមបាន ។
លោកអ្នកមិនចាំបាច់ប្រើស្រោម ២ ឬ៣ជាន់ទេ ប្រសិនបើលោកអ្នកចង់ប្រើប្រាស់ឱ្យបានត្រឹមត្រូវនោះ វានឹងមិនរហែកឡើយ ។ មូលហេតុដែលធ្វើឱ្យស្រោមរហែកគឺ ដោយសារស្រោមនោះចាស់ ឬក៏ហួសថ្ងៃកំណត់ ។ អ្នកខ្លះមិនបានច្របាច់ខ្យល់ចេញពីចុងស្រោម ដូច្នេះនៅចុងស្រោមមានខ្យល់ពេលដែលទឹកកាមចេញមកវាធ្វើឱ្យមានសម្ពាធខ្លាំងនៅចុងស្រោមដែលអាចធ្វើឱ្យស្រោមរហែកបាន ។ ប្រសិនបើស្ត្រីត្រូវគេបង្ខំឱ្យរួមភេទ ឬក៏រួមភេទដោយអំពើហិង្សាមិនមានភាពទន់ភ្លន់ដោយប្រការណាមួយនោះ ធ្វើឱ្យទ្វារមាសមានទឹករំអិលតិច ក៏អាចឱ្យស្រោមរហែកបានដែរ ។
